कराँची, ६ वैशाख । पाकिस्तानमा शहबाज सरिफको नयाँ मन्त्रिपरिषद्ले मंगलबार सपथ ग्रहण गरेको छ । सरिफको मन्त्रिपरिषदमा ३४ मन्त्री रहेका छन् । यसबाहेक तीन जना सल्लाहकार पनि राखिएका छन् ।
सिनेटका अध्यक्ष सादिक संजरानीले मन्त्रिपरिषद्का सबै सदस्यलाई सपथ ग्रहण गराएका हुन् । मन्त्रीहरूको विभाग बाँडफाँट हुन बाँकी छ । अस्वस्थताका कारण राष्ट्रपति आरिफ अली कार्यक्रम सकिनुअघि नै प्रस्थान गरेका थिए । ३७ मन्त्रिपरिषद् सदस्यमध्ये ३० जना मन्त्री र चार राज्यमन्त्री छन् । यसबाहेक तीन सल्लाहकारले पनि सपथ लिएका छन् ।
मन्त्रिपरिषदमा मुस्लिम लिगका १२, पाकिस्तान पिपल्स पार्टीका ९ र अन्य १६ दलका गठबन्धनका सदस्य छन् ।
पाकिस्तानमा करिब १० दिनअघि इमरान खानको सरकार पतन भएको थियो । त्यसपछि गत हप्ता शहबाज सरिफ पाकिस्तानको नयाँ प्रधानमन्त्री बनेका हुन् ।
