भरतपुर, ८ वैशाख । नेपाल औषधी उत्पादक संघको आयोजनामा वैशाख ९ गते शुक्रबार भरतपुरमा नेपाल फर्मा एक्स्पो २०२२ सुरु हुँदैछ । चितवन एक्स्पो सेन्टर भरतपुरमा वैशाख ११ गतेसम्म चल्ने उक्त एक्स्पोको उद्घाटन राष्ट्रपति विद्यादेवी भण्डारीले गर्नुहुनेछ ।
एक्स्पोबारे जानकारी दिन बिहीबार भरतपुरमा पत्रकार सम्मेलनको आयोजना गरिएको थियो । पत्रकार सम्मेलनमा दिइएको जानकारी अनुसार एक्स्पोमा स्वदेशी ३७ वटा र बहुराष्ट्रिय १२३ वटा औषधि उत्पादक कम्पनी गरी कूल १६० वटा स्टल रहने छन् ।
एक्स्पो आयोजनाको उद्देश्य नेपालमा उत्पादन भइरहेका औषधी उत्पादनको प्रविधि र यसमा अपनाइएका संवेदनशीलताको बारेमा जनमानसमा सचेतना दिने, नेपालको औषधी उत्पादनलाई अन्तर्राष्ट्रिय स्तरसम्म पु¥याउन अझ प्रविधिमैत्री र दक्षता प्रदान गर्ने, औषधी प्राविधिक र फर्मासिस्टहरुलाई अन्तर्राष्ट्रिय स्तरको नवीन प्राविधिक ज्ञान दिने रहेको संयोजक जी नारायणबहादुर क्षेत्रीले बताउनु भयो ।
एक्स्पोमा आवद्ध संस्थाहरुमा औषधी व्यवस्था विभाग, नेपाल फार्मेसी काउन्सील, नेपाल औषधी व्यावसायिक संघ, नेपाल औषधी थोक व्यवसायी संघ, नेपाल उद्योग वाणिज्य महासंघ, नेपाल उद्योग परिसंघ, नेपाल फर्मास्युटिकल एसोसिएसन र नेपाल फार्मेसी संघ रहेका छन् ।
करिब ३० हजार दर्शकले एक्स्पोको अवलोकन गर्ने आयोजकको अनुमान छ । एक्स्पो अवलोकनका लागि प्रवेश निःशुल्क गरिएको संघका महासचिव विप्लव अधिकारीले बताउनु भयो । एक्स्पो आयोजनामा एक करोड २५ लाख रुपैयाँ खर्च हुने अनुमान गरिएको छ ।
