Search
Close this search box.

चितवनमा गठबन्धनभित्र भागबन्डाको सकस

चितवन, ९ वैशाख । सत्तारूढ गठबन्धनले भरतपुर महानगरको मेयर नेकपा माओवादी केन्द्रले पाउने सहमति गरेसँगै चितवनका बाँकी स्थानीय तहमा पनि तालमेलको तयारी सुरू भएको छ । तर नेपाली कांग्रेस नेतृत्वको पाँच दलीय गठबन्धनमा भने उम्मेदवार टुंग्याउन सकस देखिएको छ ।

नेपाली कांग्रेसको जिल्ला समितिले केही दिनअघिसम्म भरतपुरको मेयर आफूले नपाउँदासम्म अरूमा तालमेलको छलफल सुरू हुनै नसक्ने अडान लिँदै आएको थियो । गठबन्धनमा भएको सहमति कार्यान्वयन गर्न पार्टीको केन्द्रले निर्देशन दिएपछि चितवनमा गएको बुधबारदेखि तालमेलको छलफल सुरू भएको हो ।

भरतपुरको मेयरमा उम्मेदवारी दिन नपाएको कांग्रेसमाथि उसले दाबी गरेका अन्य पालिकाका प्रमुख, उपप्रमुख पद पनि छाड्न दबाब परेको छ । नेपाली कांग्रेसले जिल्लाका ७ मध्ये कम्तीमा ४ स्थानीय तहको प्रमुख मागेको छ । कांग्रेसले रत्ननगर, खैरहनी, कालिका नगरपालिका र इच्छाकामना गाउँपालिका छाड्न चाहेको छैन ।

माओवादीले माडी नगरपालिका र इच्छाकामना गाउँपालिकामा दाबी गरेको छ । गत निर्वाचनमा इच्छाकामना गाउँपालिकाका अध्यक्ष र उपाध्यक्ष दुबै पद कांग्रेसले जितेको थियो । राप्ती नगरपालिकाको प्रमुख भने नेकपा एकीकृत समाजवादीलाई दिन गठबन्धन सहमत भएको छ ।

‘प्रारम्भिक छलफलमा अन्य चार दलले आफ्नो जनमत नै नभएको ठाउँमा प्रमुख पद दाबी गरेका छन् । ९० प्रतिशतभन्दा बढी वडाध्यक्षमा दाबी गरेका छन्,’ नेपाली कांग्रेस चितवनका एक पदाधिकारीले भने, ‘जताततै कांग्रेसलाई नै पेल्न खोजिएको छ । तैपनि केन्द्रको निर्देशन भएकाले छलफल गरिरहेका छौं ।’

नेकपा एमालेले भने ६० प्रतिशतभन्दा बढी वडाध्यक्षको उम्मेदवार सर्वसम्मत भइसकेको दाबी गरेको छ । जिल्ला अध्यक्ष रामप्रसाद न्यौपानेले भरतपुरका २० वटा वडाका उम्मेदवार सर्वसम्मत भएर घरदैलो अभियानमा लागिसकेको बताए । ‘अन्य स्थानीय तहहरूमा पनि प्रायः वडामा सर्वसम्मत भएको छ’ उनले भने ।

Share:

तपाईको प्रतिक्रिया

सम्बन्धित समाचारहरू

किसानको समस्याको समाधानका लागि भन्दै नवलपुरका दुग्ध सहकारीको बिशेष भेला सम्पन्न

पञ्चशील महाबौद्ध गुम्बाको एक हप्ते कङ्ग्युर (त्रिपिटक) पाठ वाचन सम्पन्न

रत्न राज्य लक्ष्मी मा.वि. गैंडाकोट १० मा ब्यवहारिक अभ्यास ओजेटिको अन्तिम मुल्याङ्गकन सम्पन्न

विश्व कप खेल्ने खेलाडीको खोजी गर्न लिग क्रिकेट प्रतियोगिता : प्रमुख रेनु दाहाल  

पञ्चशील महाबौद्ध गुम्बा शरदपुरमा यहि फाल्गुन ५ शनिबारदेखि त्रिपिटक (कंग्युर) पाठ बाचन हुँदै

नेपाल मगर संघ, गैंडाकोटको आयोजनामा रक्तदान कार्यक्रम सम्पन्न, ३१ ज्नाले गरे रक्तदान