भाद्र १५, कावासोती
नेपाल पत्रकार महासंघ नवलपुर शाखाको भवन शिलान्यास गरिएको छ ।
बुधबार एक कार्यक्रमबा बीच गण्डकी प्रदेशका मुख्य मन्त्री कृष्णचन्द्र नेपाली पोख्रेलले भवन शिलान्यास गर्नुभएको हो । शिलान्यास पछि कार्यक्रममा सम्बोधन गर्दै उहाँले प्रदेश सरकारले अध्यादेश मार्फत केही विद्येयक ल्याउने तयारी गरेको बताउनुभयो । उहाँले सञ्चार विद्येयक समेत प्रदेश सरकारले अध्यादेश मार्फत ल्याउने तयारी गरेको बताउँदै प्रेस स्वतन्त्रता हनन नहुने गरि विद्येयक ल्याउने बताउनुभयो । उहाँले अधिवेशनमा नै केही विद्येयक ल्याउने तयारी गरे पनि नसकिएको कारण अध्यादेशका रुपमा ल्याउने बताउनुभयो ।
उहाँले भन्नुभयो – ‘यो वा त्यो बहानामा पत्रकार माथि कुनै पनि अंकुश नलगाउने किसिमको ऐन हुनुपर्छ भन्ने हाम्रो मान्यता हो । हामिले पूर्ण प्रेस स्वतन्त्रता कायम राखेर ऐन ल्याउनेछौँ । ’ उहाँले महासङ्घको भवन निर्माणका लागि बजेट र आवश्यक सहयोग गर्न प्रदेश सरकार प्रतिबद्ध रहेको बताउनुभयो । उहाँले भवन निर्माण गर्नु मात्रै ठूलो कुरा नभई छाता सङ्गठनका रुपमा रहेको महासङ्घले सबैलाई समेटेर सबैको अपनत्व हुने गरि काम गर्नुपर्नेमा समेत जोड दिनुभयो ।
कार्यक्रममा प्रदेश सभा सदस्य रोशन बहादुर गाहा , विष्णु प्रसाद लामिछाने , ओमकला गौतम , नेपाल पत्रकार महासंघ केन्द्रिय अध्यक्ष विपुल पोख्रेल , जिल्ला समन्वय समिति नवलपुरका प्रमुख बाबुराम विश्वकर्मा , कावासोती नगरपालिका प्रमुख विष्णु प्रसाद भुसाल , मध्यविन्दु नगर प्रमुख भिमलाल अधिकारी , देवचुली नगर प्रमुख हरि प्रसाद न्यौपाने , विनयी त्रिवेणी गाउँपालिका अध्यक्ष धनश्याम गिरी , हुप्सेकोट गाउँपालिका प्रमुख लक्ष्मी पाण्डे , मुख्य मन्त्री कार्यालयका सचिव मनमाया पंगेनी , नेपाल पत्रकार महासंघ गण्डकी प्रदेश उपाध्यक्ष दीपक भट्टराई , नेपाली काङ्ग्रेस जिल्ला सभापति महेन्द्रध्वज जिशि, नेकपा एमाले जिल्ला कमिटी उपसचिव भिमलाल कडेल , माओवादी केन्द्र जिल्ला सचिव शुस्मा खनाल , प्रेस चौतारी केन्द्रिय सदस्य हिमालदेव पंगेनी , प्रेस युनियन केन्द्रिय सदस्य घनश्याम बगाले , प्रेस चौतारी जिल्ला अध्यक्ष शालिकराम कोइराला लगायतका अतिथिहरूको सहभागिता रहेको थियो ।
कार्यक्रममा बोल्नुभएका वक्ताहरूले महासङ्घको भवन निर्माणका लागि आफ्नो तर्फबाट साथ सहयोग गर्ने प्रतिबद्धता जनाउनुभएको थियो । जिल्लाको नमुना सदरमुकाम स्थलमा नेपाल पत्रकार महासङ्घको भवन शिलान्यास हुने दिन ऐतिहासिक दिन रहेको जनाउँदै समयमै भवन निर्माण होस् भन्ने शुभकामना व्यक्त गर्नुभयो ।
नेपाल पत्रकार महासङ्घ नवलपुरका अध्यक्ष बिरेन्द्र पराजुलीको अध्यक्षतामा कार्यक्रम भएको हो ।
नमुना सदरमुकाम स्थल वडा नं. ३ को नव निर्मित भवन स्थल नजिकै नेपाल पत्रकार महासंघ नवलपुर शाखाको भवन निर्माण हुन लागेको हो ।
प्रदेश सरकारबाट बिनियोजित बजेटले पर्खाल लगाउने काम सम्पन्न भएको छ । महासङ्घको भवन निर्माणका लागि जिल्लाका विभिन्न स्थानीय तहले बजेट समेत बिनियोजन गरेका छन् ।
