११ भदौ, धनगढी
दार्चुलामा आत्मदाहको प्रयास गरेकी एक महिलाको मृत्यु भएको छ । शरीरमा मट्टीतेल छर्केर आगो लगाएर उनले गत आईतबार आत्मदाहको प्रयास गरेकी थिईन् ।
आत्मदाहको प्रयास गरि मृत्यु हुने महिला शैल्यशिखर नगरपालिका–५ सेतकलाकी ४५ वर्षीया सुना साउँद भएको प्रहरीले जनाएको छ । गोकुलेश्वर अस्पतालमा सामान्य उपचारपछि थप उपचारका लागि धनगढी ल्याउने क्रममा बाटोमै उनको मृत्यु भएको बताईएको छ । बैतडीको पाटन पुग्ने बेला साउँदको मृत्यु भएको प्रहरीले बताएको छ ।
घरमा कोही नभएको बेला शरीरमा मट्टीतेल छर्केर आत्मदाहको प्रयास गरेकी साउँदको ८० प्रतिशत शरीर जलिसकेको थियो । प्रहरीका अनुसार घरमा श्रीमान् श्रीमती बस्ने गरेकोमा श्रीमान् बजारतिर गएका बेला उनले आगो लगाएकी थिइन् । उनको आत्मदाह गर्नुको कारण भने अझैसम्म खुलेको छैन ।
